القصيده :تدري وش اللي يجعل القلب محزون
تدري وش اللي يجعل القلب محزون=حلم سعى له وقـت عيـا يطولـه
حاول على عيشه كما اللي يعيشون=وصارع لحلم مايجـي بالسهولـه
والخاتمه يرجع محطـم ومغبـون=ضاع الطموح وضاع حلم الطفولـه
الله من هم بـذا الصـدر مكنـون=يطري عليه يـوم يطـرون زولـه
هم بوسط القلـب يكفـي لمليـون=ياخذ عليه كـل ماامسيـت جولـه
لاشك انا من غدر الايام مطعـون=والدمع والدم اختلـط فـي سيولـه
وينه ربيع العمـر ياللـي تقولـون=ربيـع عمـري صارفتـرة ذبولـه
ماعاد للايـام فـي ناظـري لـون=غير الظلام اللي كسنتـي همولـه
بالهون يادنيا الصواديـف بالهـون=ماعاد باقي شي يصعـب حصولـه
ياونتي ونة من النـاس مسجـون=تربط جويـدات السلاسـل رجوله
ياما طلبت العون ماجانـي العـون=اشوف باب العـون تقـرع قفولـه
ولا شك غيري ناس مثلي يحسـون=لكن صعب الهـم صوبـي ميولـه
ومن مامعاه احساس ياناس مجنون=يقدر يشيل الجمـر داخـل حثولـه
