دواوين شعراء النشاما::قال الغواري ::فايح بن فيحان الغويري
القصيده :قال الغواري
قال الغواري والغواري ماتضيق به السبل =يعرف مخارج دنيته لو كان له ليلً طويل
أبيات تلعب في خفوقه جات له نصح وغزل =تسقي ضما منهو سمعها بالقراح السلسبيل
ياصاحبي والعلم نور يزيح ظلمات الجهل =في عالمً ثلثـه حسد ثلثه جشع ثلثه نبيل
شوف العرب من جهل كانت تعبد اللات وهُبل =أصنام يعرف عجزها من كان ذو علمً قليل
واذا تبي تمشي حياتك لاتفكر في قبل =واشطب من القاموس كلمة صعب ولاّ مستحيل
ولاتقول لتجربه مرتك بائت بالفشل=منها تعلـّم ياعساها خير من عند الكفيل
ضع الهدف قدام عينك ثم على الله أتكل =عليك بالأسباب والباقي بيد نعم الوكيل
قدمك سقها للعلا ومن سار في دربه وصل =نظرك مده للسما وأن طاح للجدي وسهيل
وأصبر وقـوّ العزم وأثبت خلك أرسى من جبل =وأبرك لحملك لاتخلي غيرك لحملك يشيل
ولاتنتظر منهو رقا يرفعك . وأرفع من نزل =ولاتفكر فالخساير من ورى فعل الجميل
تنجح مادام أن الجزاء يكون من جنس العمل =ولابد من بعد الضما رب السما يرزقك سيل
ياصاحبي والليل طال ولاح لي صبح الأمـل =ورأيت عود السنبله مع هبت النسمـه يميل
شمس الضحى تسكن جبين الصبح والليل يأفل =ولاعاد يبقي من ظلآمه غير ماضـمّ الجديـل
فيه الطبيعه والخيال وكل ماثار الجدل =بحجاجه القوس وسهوم العشق بالرمش الضليل
وعينً بها لمعـة حزن تُضِـل منهو مايضـل =دمعـه وترفض لاتفارق محجر الطرف الكحيل
والورد لونه مكتسي خدود ورسم لوحة خجل =فيها ملامح سحر تحـوي بينها سيفً صقيل
وياحبـة الرمـآن يالألمـآس ياطعم العسل =يافتنـة البسمـه وعذب الحكي ياشمس الأصيل
ومنتوق جيد وذابت بنحره حـُلي وجسمـه حُـلـل =سبحانه اللي خالقه بالحسن ماوجد له مثيل
ياصاحبي والمعضلـه طال الغياب وماحصل=بعده لقـا وبداية غيابه هي أشعال الفتيل
ياليـن ماثارت جموع الشوق وأجتاحت دول=فالصدر وأنهار الشموخ وزادت هموم العليل
فكر أنشغل.. جسمً نحـل ..أي بالله مصابي جلـل =برق . ورعد .. هلـت مزونً تغسل البيدا غسيل
والحب داء ولاعرفنا له دوى غير الوصل =يكافحـه .. وأذا تمكـّن وأنقطع وصل الخليل .!
لاعاد تستغرب جنون العشق وأنكار العقل =ولاّ ليا من قيل بـ.ان فلان من عشقه قتيـل
مع ذالك ! أردد لنفسي . لآح لي صبح الأمـل =لو أن دورات الليالي حطمـت حلـم النبيـل
