القصيده :شــيــخــة الــغــيــد
بين هم(ن) قديم وبين هم(ن) جديد=وبين جرح الزمان وبين جرح الغرام
وبين يوم(ن) شقي وبين يومٍ سعيد=تجري اسنين عمري بين نور وظلام
الحياة اتعبتني بس ماني وحيد=قبل لا اخلق شكى منها كثير الآنام
ومن خذت قلبي وقفت وراحت بعيد=شيخة الغيد وادري ماعليها كلام
بعدها يوم حزن وقربها يوم عيد=وشوفها لو حصلي غايتي والمرام
كيف اوصف حلاها في بيوت القصيد=يتعب الشاعر ويلحق بيوته ملام
ماورى القد قد ولا ورى الجيد جيد=وغرة(ن) لا تجلت مثل بدر التمام
غيرها... اسمحولي ليش اكرر واعيد=ليش اخلي مابيني والقصايد خصام
طوعت قلبي اللي كنت احسبه عنيد=ومشته في هواها عكس سير النظام
ولو جروح المحبه في ضميري تزيد=واحرمت عيني الراحه وحلو المنام
عاشق(ن) مامشى وقته على مايريد=بس راضي بوضعه لو ماهو تمام
