القصيده :هذي قصيده مسسويها على شانك
ياللي على ضلع صدري حام شيهانك=وانا على ضلع صدرك حام شيهانـي
فقدتك وجيـت عجّـل أطـق بيبانـك=عاني وأنا ماأعتبرها جيـت العانـي
جيت أستعيد النظر وأشـم ريحانـك=وأسكر على ظل بابك سكـر ربانـي
وأرقصّ الطير لين يميـل أغصانـك=أغصانك اللي لامالت مالت أغصانـي
وأثبت لك اني محبً من هوى صانـك=ماني كما اللي يحب ويصبح الجانـي
انا عشقتـك قبـل لا أهيـم فالحانـك=قبل قبل لاتجي فـي طـارف لسانـي
كنت أتتبّع خطـا ربعـك وجيرانـك=لاجوك؟ وأن جو قلت الزين ماطراني
سبحانه اللي رفـع قـدرك ولاهانـك=وأجبرني أسئل جليسك عني وشانـي
من دون لاأنت تعرف عاديت عدوانك=شف كيف هذا الغلا والولـف ودانـي
كتبت فيـك القصايـد ليـن جدرانـك=صاحت على من سكن بالبيت من داني
شاعر يعسف القصايد عسف من شانك=لـوأن مانـي مثـل نـزار قبـانـي
مجنون بك وأبتلى عقلـي بجنجانـك=وأبلشنـي الله بجنجانـك وجنجانـي
لو ان هالموت يسكـن بيـن حجانـك=أموت بك بـس توعدنـي ماتنسانـي
ولوأن هالموت يمنعني عن أحضانـك=سجلني أول ضحية موت الاحضانـي
فديت ملـح القـوام وسكـر لسانـك=وفديـت فـمً(ن) كمـا خاتـم سليمانـي
وفديت لب الخـدود ودعـجّ أعيانـك=اللي على وصفهـا طاريـك سرانـي
ياويش لولـوك ولاويـش مرجانـك=ولاياويـش الحـلا ياعـود ريحانـي
حمار خدك ليا مـن بانـت اسنانـك=حمار نار التميـس بكـف الافغانـي
أنا اشهد أن الدلـع والزيـن عنوانـك=وأناأشهـد أن العنـا والهـم عنوانـي
أن قلت أبقفي تسابق دمعـك أحزانـك=تقول كـن الرمـوش تقولـي مانـي
أصلاً ماعاد أقدر أقفي عنك لومانـك=باللي ملكتـه بشـرع الله والأديانـي
رسيت بين الضلوع الحدب بأحسانـك=ف أغلا مساحه بهيكل عظـم الانسانـي
وأن قلت لي وين أنـا بقولـك عانـك=هنا بصـدري هنـا ياقلبـي الثانـي
وأن كان داخلك شك أعطيك برهانـك=لاأجفاك من دون ذنب أوأنت تجفانـي
هذي قصيده مسويهـا علـى شانـك=رح قول خالد مسويها علـى شانـي
