القصيده :هـــرج المعــاليق
للهم في هرج المعاليق طاري = و للشوق في جوف القوافي مواثيق
و انا اصارع رغبتي و اختياري = يعينك الله يا الضلوع المشافيق
يا صاحبي لا تنشدن ..ويش جاري = عيني تغمض تالي الليل و اتفيق
اضحك و اسامر و اتكبر و اداري = لكن جروحي مالقتها المخاليق
جرح ٍ رسم في وجه الاحزان داري = و جرح ٍ نحت وجهي على الهم و الضيق
و جرح ٍ لفاني تالي الليل ساري = شق الحنايا لين جش الطواريق
و البارحة ياخوك.. جتني طواري = جتني تحرّق مهجة القلب تحريق
طواري ٍ تضرب بحد الشباري = حاولت اروّغ..مار مامن توافيق
كني صويب ٍ ما لحقته الطواري = والا غريب ٍ ما لقا له مطاليق
و الا طريح ٍ للاسود الضواري = تقاسموا لحمه على فكة الريق
كله سبب هم ٍ على البال طاري = البارحة .. ياشين هرج المعاليق
